Landskapsparken blir organisert som ein medlemsorganisasjon der privatpersonar/familiar, organisasjonar og bedrifter med tilknyting til området kan vera medlem. Det blei vald eit permanent styre på årsmøtet i mai, og det vil bli oppretta arbeidsgrupper for ulike tema (td. næringsutvikling, turstiar, kulturminnevern, lokal mat, landbruk og kulturlandskap).

På folkemøtet 8. april 2010 blei det bestemt at det skal etablerast ein landskapspark i Sveio. Parken blei endeleg etablert med eigne vedtekter på årsmøtet 27mai.

Målet er å samarbeida om å nytta lokal kultur og tradisjonar i utviklinga av reiseliv og anna næringsliv i området, samstundes som ein tek vare på kvalitetane i landskapet. Landskapsparken har konkrete mål om å skapa nye arbeidsplassar, og å styrka eksisterande næringar. Dette gjeld ikkje minst det tradisjonelle landbruket, som har lagt grunnlaget for det landskapet me kjenner i dag.

Namnet ”Kystlandskapsparken i Sveio” er vald fordi det seier noko om kva me vil profilera oss med (kystlandskapet), og fordi det er fleksibelt med tanke på det geografiske området parken skal dekkja.